Го́споди Иису́се Христе́, Бо́же наш! Не попусти́ излива́ться зло́бе слуг анти́христовых на ве́рные ча́да Твоя́, на неви́нных и не́мощных, неразу́мных и заблу́дших, стра́ждующих и наси́лие терпя́щих, не иму́щих ины́я защи́ты, ра́зве Тебе! Вемы, я́ко по беззако́ниям на́шим досто́йны наказа́ния, но потерпи́ еще́ на нас, Го́споди, не взрасту́т ли в сей год в нас плоды́ покая́ния, не взы́щутся ли о́вцы заблу́дшие, не разы́щется ли дра́хма уте́рянная?
Прости́ нас, Го́споди, отступа́ющих от за́поведей Твои́х! Не возда́ждь нам по дело́м на́шим, но по вели́цей Твое́й ми́лости обрати́ нас от земна́го к небе́сному, от сме́ртнаго к безсме́ртному. Не дай торжества́ си́лам ми́ра сего́, но простри́ ру́ку Твою́ от свята́го жили́ща Твоего́ над стра́ждущим оте́чеством на́шим и благослови́ ны, и пода́ждь мир Твой всем се́рдцем ча́ющим его! Ами́нь!
+ Митрополит Агафангел
